O Portal de Contratos Públicos de Galicia publica hoxe a licitación que inclúe a adquisición dun sistema de tomografía de coherencia con anxiografía OCT-A e dúas lámpadas de fendedura. Este novo equipamento permitirá obter imaxes de alta resolución, estudar as estruturas oculares de xeito non invasivo e analizar a microvascularización ocular, facilitando o seguimento de patoloxías como a dexeneración macular ou o glaucoma.
As lámpadas de fendedura, elementos esenciais para a exploración oftalmolóxica, permitirán examinar con detalle as estruturas oculares e valorar alteracións. A incorporación destes equipos mellorará a calidade das exploracións, optimizará os fluxos de traballo e reforzará a capacidade resolutiva da área sanitaria.
O Hospital de Conxo é un centro de referencia a nivel nacional no tratamento de tumores intraoculares en adultos e na reconstrución da superficie ocular complexa, recibindo pacientes doutras comunidades autónomas.
As empresas interesadas teñen ata o 9 de novembro para presentar as súas ofertas.
