A resolución da Consellería de Medio Ambiente e Cambio Climático non prevé impactos significativos sobre a contorna sempre que se cumpran os condicionantes fixados no informe ambiental e na documentación avaliada. O proxecto, promovido pola Axencia Galega de Infraestruturas (AXI), busca reordenar o tráfico que transita polas parroquias de Alba, Cerponzóns e Lérez.
A nova vía conectará a PO-531 e a N-550 mediante glorietas, unha existente e outra de nova construción. Tamén se proxecta un viaduto para cruzar a AP-9 e a vía do ferrocarril. O informe de impacto ambiental foi elaborado tras unha avaliación simplificada e un proceso de participación pública sen alegacións, consultando a 13 organismos.
As avaliacións consideran o proxecto viable, sempre que se cumpran os condicionantes establecidos en relación á protección da atmosfera, poboación e saúde; augas e leitos fluviais; solo e infraestruturas; patrimonio natural e cultural; integración paisaxística e xestión de residuos. O informe de impacto ambiental non exime ao promotor de obter todas as autorizacións necesarias.
