O alcalde de Rois, Ramón Tojo, asistiu este venres ao acto de clausura do Programa Integrado de Emprego Dodro 2025-26. Esta iniciativa, xestionada polo Concello de Dodro, contou coa participación dos municipios de Rois, Padrón, Pontecesures, Catoira e Valga. Ao longo de nove meses, un cento de persoas desempregadas destes seis concellos recibiron formación, e ao remate do programa, o 38% delas xa atoparan emprego.
Ramón Tojo valorou o esforzo do alumnado e felicitou especialmente ás 38 persoas que xa atoparon traballo, destacando que se superou o obxectivo establecido pola Xunta de Galicia. O alcalde de Rois subliñou a importancia da cooperación entre administracións, afirmando que "cando sumamos esforzos, chegamos máis lonxe". Tamén resaltou a capacidade de seis concellos, con gobernos de diferente signo político, para "poñerse de acordo arredor dun obxectivo común: ofrecerlles máis oportunidades ás nosas veciñas e veciños".
O rexedor agradeceu o traballo do equipo técnico e docente, a implicación das empresas colaboradoras e o financiamento da Xunta de Galicia. O director territorial da Consellería de Emprego, Juan José Couce, lembrou que a Xunta achega 220.000 euros a esta iniciativa e tamén eloxiou a colaboración interadministrativa para "mellorar a empregabilidade das persoas da comarca". Para a edición 2026-2027, avanzou achegas de 230.000 euros e confiou en que o programa repita os bos resultados.
Antes da clausura, os participantes asistiron a unha xornada con representantes de cinco empresas da comarca: Ana Muñiz, STAC, Cortizo, Finsa e Fesba. Explicáronlles os perfís profesionais demandados, ofreceron orientación para presentar currículos e recomendacións para procesos de selección, achegando unha visión directa das necesidades empresariais.
Durante os nove meses de duración, o programa ofreceu información e asesoramento laboral personalizado, ademais de formación en sectores como a industria alimentaria, fabricación mecánica, téxtil, administración e xestión, comercio e loxística, hostalería e turismo, servizos á comunidade e sociosanitarios, e imaxe e son. Completouse con obradoiros de coaching, intelixencia emocional, habilidades sociais, preparación de entrevistas, prácticas non laborais e accións para fomentar o autoemprego.
