Tras as citas de fin de semana en Campelo, Raxó e Combarro, a programación de magostos en Poio trasládase mañá, martes 10 de novembro, á parroquia de San Martiño. O Concello organiza esta tradicional celebración que comezará ás 20.00 horas. A Asociación Laretas sumará ás 21.30 horas coa actuación do Trío Rever.
O mércores 11 de novembro, a honra a San Martiño celebrarase cunha misa solemne cantada pola Coral Virxe da Renda e o grupo de gaitas Vides Novas, seguida dunha tirada de fogos. Pola tarde, ás 17.30 horas, o Mago Paco ofrecerá un espectáculo de maxia familiar. Ambas as xornadas contarán cunha carpa no adro para maior comodidade.
O sábado 14 de novembro haberá dous magostos: ás 19.30 horas no Sartal, organizado pola ACV Ronsel, e ás 20.00 horas na Seca, pola AV Boureante. Ao día seguinte, domingo 15, a SCD de Samieira celebrará o seu magosto na Comunidade de Montes Río de Bois ás 19.00 horas.
O ciclo de magostos continuará o sábado 21 de novembro en Vilariño, organizado pola asociación veciñal e cultural na rúa Vilariño de Abaixo (20.00 horas). O ciclo pecharase o sábado 28 de novembro en San Salvador, cun magosto da AC Viñas das Festas de San Salvador no adro da igrexa (20.00 horas).
O Concello de Poio colabora coas asociacións veciñais e culturais na organización destes eventos cunha liña de axudas específica para magostos, cunha achega máxima de 600 euros por cita, para fomentar esta tradición no municipio.
