O presidente da Deputación da Coruña, Valentín González Formoso, e o reitor da UDC, Ricardo Cao, asinaron hoxe dous convenios de colaboración. A institución provincial achega 208.000 euros para cofinanciar programas de divulgación científica, educación e cultura, e 300.000 euros para renovar a cuberta da aula de estudo situada no campus de Elviña.
O primeiro acordo destina 208.000 euros (o 80% dun orzamento de 260.000 euros) a financiar o programa de actividades da UDC. Este abrangue ámbitos como a sustentabilidade, a igualdade, a xustiza social e a divulgación científica. Inclúe iniciativas como os Premios Isabel Zendal, o programa “Divulgando o noso”, obradoiros creativos, aulas de teatro, danza e música, o club de lectura de NORMAL, residencias artísticas, exposicións e o Festival Internacional de Teatro Universitario da Coruña.
A liña de sustentabilidade conta cun orzamento de 130.000 euros e inclúe o proxecto Green Power, onde estudantes deseñan e constrúen vehículos eléctricos, e a final nacional da First Lego League, centrada na robótica educativa. Tamén se apoia a Clínica Xurídica “Xustiza Social”, que ofrece coñecementos xurídicos a persoas vulnerables, e programas de formación e empregabilidade para persoas con discapacidade cognitiva no campus de Ferrol.
O segundo convenio destina 300.000 euros á rehabilitación da cuberta da aula de estudo Xoana Capdevielle, no campus de Elviña. A actuación, cun orzamento total de 738.562,09 euros, busca resolver problemas de estanqueidade e filtracións de humidades deste espazo con 654 postos de estudo. Os traballos inclúen a renovación do illamento térmico, a impermeabilización e a substitución das canles de recollida de auga.
