A Consellería de Emprego, Comercio e Emigración da Xunta de Galicia publicou no Diario Oficial de Galicia (DOG) unha orde de axudas dotada con 1,2 millóns de euros para que entidades sen ánimo de lucro poidan contratar axentes de emprego e unidades de apoio. Estímase que se financiará a contratación duns 40 profesionais.
O prazo para solicitar estas axudas abriuse hoxe, 19 de setembro, e prolongarase ata o 19 de outubro. O obxectivo principal é impulsar a implantación das políticas activas de emprego, especialmente aquelas relacionadas coa creación de actividade empresarial e a inserción laboral de persoas con discapacidade ou en risco de exclusión social.
As funcións destes axentes de emprego incluirán a colaboración na creación de actividade empresarial, a promoción desa actividade, o asesoramento puntual de proxectos e a prospección de mercado, co fin de dinamizar a economía local e rural e xerar novas oportunidades laborais.
A iniciativa busca potenciar o papel da Rede de técnicos de emprego de Galicia como motor do emprendemento e da creación de emprego. Preténdese apoiar a constitución de pequenas e medianas empresas, contribuír á cobertura de vacantes no mercado laboral e favorecer un tecido empresarial máis estable e diversificado, promovendo un crecemento económico sostido.
Estes profesionais tamén verán reforzado o seu traballo grazas ás accións desenvolvidas dende os 15 Polos de emprendemento e apoio ao emprego da Xunta de Galicia, que xa atenderon máis de 7.200 proxectos empresariais en toda a comunidade.
