O Diario Oficial de Galicia (DOG) deu a coñecer a resolución da Dirección Xeral de Recursos Humanos do Servizo Galego de Saúde, que detalla a relación provisional coa orde de prelación e a puntuación dos aspirantes admitidos. As categorías inclúen celador, celador con discapacidade intelectual, técnico en farmacia, técnico superior en anatomía patolóxica e citoloxía, en dietética, en documentación sanitaria, en hixiene bucodental, en imaxe para o diagnóstico, en laboratorio de diagnóstico clínico e en radioterapia.
Un total de 24.130 aspirantes resultaron admitidos. A categoría de celador foi a que concentrou máis inscricións con 13.632, seguida pola de técnico superior en laboratorio de diagnóstico clínico con 2.826. Outras categorías con alta demanda foron técnico en farmacia (2.254) e técnico en imaxe para o diagnóstico (2.199).
O 10,62% das inscricións foron novas, realizadas despois da data límite do anterior proceso. Por categorías, destacaron as 1.201 novas inscricións en celador e as 403 en laboratorio de diagnóstico clínico.
As listas están dispoñibles na páxina web do Servizo Galego de Saúde ([www.sergas.es](http://www.sergas.es)), no apartado de Emprego Público. Os aspirantes tamén poden consultar o estado das súas solicitudes a través do seu expediente electrónico persoal en Fides/expedient-e.
As persoas interesadas teñen un prazo de dez días hábiles, ata o 25 de agosto, para presentar reclamacións ante as xerencias das áreas sanitarias e as direccións con competencias na xestión de persoal das entidades adscritas á Consellería de Sanidade.
O Servizo Galego de Saúde anunciou que mañá, mércores 12 de agosto, publicará as listas provisionais para as categorías de auxiliar administrativo, persoal de servizos xerais, cociñeiro e pinche.
