A rede de compostaxe de Valga, implantada no ano 2020, continúa ampliándose coa instalación dun novo centro de compostaxe comunitaria en Vilarello. Este equipamento busca seguir achegando o modelo de xestión dos residuos orgánicos a máis familias do municipio.
O novo centro atenderá as necesidades dun importante produtor local, o restaurante O Mencer, e tamén aos veciños da contorna. Para informar sobre o seu funcionamento, levarase a cabo a comezos de novembro unha campaña informativa nos lugares de Vilarello e Vilar.
O orzamento desta actuación foi de 13.072 euros, procedentes dunha subvención da Consellería do Medio Ambiente, cofinanciada pola Unión Europea a través do programa Galicia Feder 2021-2027.
Con esta nova implantación, Valga suma xa sete centros comunitarios de compostaxe distribuídos polo municipio, ademais de ter repartido 1.050 composteiros domésticos entre a veciñanza. O obxectivo é reducir o volume de lixo que se deposita no colector verde.
O sistema xa demostra un impacto positivo, retirando arredor de 250 toneladas de residuos orgánicos ao ano do circuíto convencional, o que supón unha redución de custos económicos e ambientais, e a obtención de compost natural para uso agrícola e de xardinería.
