A nova regulación crea unha estrutura de coordinación institucional, composta por unha Comisión Organizadora e unha Comisión Técnica, co obxectivo de garantir criterios de exame xustos e equitativos. Estas comisións marcarán as directrices xerais sobre contidos, dificultade e cualificación, ademais de encargarse do desenvolvemento operativo e loxístico da proba.
Desenvolveranse bancos de materiais para facilitar a elaboración de modelos de exame e os grupos de traballo contarán cunha maior presenza de docentes de Bacharelato, achegando así un coñecemento máis directo do currículo.
“"Esta norma que sae agora con consenso, da Consellería e das tres universidades públicas, é unha norma mellor."
O conselleiro de Educación, Román Rodríguez, sinalou que o acordo busca "a maior coordinación para garantir que as probas sexan adecuadas ao nivel e contidos do currículo de Bacharelato e que se corrixan con criterios que reflictan a boa preparación do alumnado galego".
A nova orde adapta a normativa galega ao Real Decreto 534/2024 e inclúe tanto o proceso de acceso como o de admisión. A Comisión Organizadora estará conformada por representantes da Consellería e das universidades, mentres que a Comisión Técnica se encargará das tarefas loxísticas e operativas.
A composición dos grupos de traballo que redactan os exames tamén se modifica, incrementando o peso do profesorado de Bacharelato. O proceso de admisión continuará xestionado pola Comisión Interuniversitaria de Galicia (CiUG).
