Segundo os datos remitidos por MeteoSalud e MeteoGalicia, e no ámbito do Plan de Actuacións do Goberno galego fronte aos posibles efectos das altas temperaturas, a Xunta informa que desde mañá, luns, quedará desactivada a alerta por episodio de calor que rexistrou durante a fin de semana o interior de Pontevedra.
O mapa de riscos para a saúde provocados polas altas temperaturas, elaborado pola Dirección Xeral de Saúde Pública, xunto coas recomendacións e o Plan de Actuacións da Xunta de Galicia, está dispoñible para consulta.
Para a elaboración deste mapa, a Consellería de Sanidade ten en conta os datos rexistrados por Meteogalicia e por Meteosalud. Meteogalicia considera as temperaturas máximas e mínimas diarias e se se superan os límites establecidos para un episodio de calor. Pola súa banda, Meteosalud realiza os seus cálculos analizando series temporais de temperatura e mortalidade dos últimos 20 anos.
A Consellería de Sanidade ten en conta os niveis de alerta de ambos os sistemas para establecer un nivel de alerta acorde aos seus datos, co obxectivo de anticiparse aos posibles efectos das altas temperaturas na saúde da poboación galega. Por este motivo, a información contida nos mapas pode non coincidir ao responder a diferentes parámetros.
