O xurado valorou a excelencia da tradución de Buxán, destacando a súa capacidade para "recrear as peculiaridades da escrita da autora", a riqueza lingüística e o ritmo conseguido. Tamén se salientou o estilo ensaístico-literario trasladado ao galego, a escolla léxica e sintáctica axeitada, e o traballo de documentación nos paratextos.
Buxán, docente do Departamento de Filoloxía inglesa, francesa e alemá da UVigo, xa fora finalista noutras ocasións. Nesta edición, competiu con traducións de María Fe González Fernández, Laura Sáez, Sandra Sánchez Ogando e Gabriel Álvarez Martínez.
A tradutora e revisora profesional de alemán e inglés ao galego e castelán conta cunha ampla traxectoria. Licenciada pola Universidade de Vigo en 1998, ten máis de vinte anos de experiencia, centrada en documentación corporativa e técnica, así como na localización de páxinas web e márketing de produtos.
Entre as súas traducións literarias ao galego atópanse "O perfume" de Patrick Süskind, "Sobre a teoría da relatividade restrinxida e xeral" de Albert Einstein, "Heidi" de Johanna Spyri e "Infocracia: a dixitalización e a crise da democracia" de Byung-Chul Han.
Ademais, Buxán foi presidenta da Asociación Galega de Profesionais da Tradución e da Interpretación (AGPTI) e formou parte da cooperativa Catro Ventos Editora. O xurado tamén aproveitou para animar ás editoriais a destacar o nome dos tradutores nas portadas dos libros.
A entrega do galardón, que inclúe diploma, unha peza escultórica e 3000 euros, terá lugar o vindeiro sábado 17 de outubro na Casa do Concello de Corcubión.
