Os laboratorios do Centro de Investigación en Nanomateriais e Biomedicina da Universidade de Vigo (CINBIO), pertencente á Rede Cigus, convertéronse novamente nun espazo aberto á cidadanía coa celebración dunha nova edición da súa xornada de portas abertas, baixo o programa de divulgación científica Ciencia con C de CINBIO. Un total de máis de 80 persoas de diversas idades participaron nesta iniciativa, pensada para presentar a investigación que se leva a cabo no centro dunha forma participativa e próxima.
A xornada comezou na tarde do venres coa benvida ás e aos asistentes por parte do equipo directivo do centro, quen subliñou a importancia de xerar oportunidades para que a sociedade coñeza de preto o traballo do persoal investigador. Posteriormente, os participantes percorreron as instalacións en pequenos grupos, seguindo un itinerario guiado por diferentes laboratorios e espazos de investigación. Durante case tres horas, tiveron a oportunidade de experimentar con algunhas das liñas de traballo do CINBIO a través de obradoiros e demostracións prácticas deseñadas polos seus grupos de investigación.
As actividades abrangueron desde os principios básicos da xenética e experiencias coa luz e nanomateriais, ata a creación de moléculas con propiedades innovadoras mediante química orgánica. A nanotecnoloxía tamén tivo un papel relevante, con experimentos sobre o potencial das nanopartículas, sistemas avanzados de liberación de fármacos e o desenvolvemento de novos materiais. Ademais, os asistentes exploraron conceptos de cociña molecular e a contribución da investigación química á innovación cotiá.
Tamén se afondou no funcionamento do cerebro e a comunicación neuronal, así como nas propiedades plasmónicas de nanopartículas metálicas de ouro e prata, con experiencias adaptadas a todas as idades. Estas propostas divulgativas foron coordinadas por persoal investigador de diversos grupos do centro, como Filoxenómica, CellCOM, ORCHID, Biomimat, TeamNanoTech (TNT), Neurocircuits, NanoBioMateriais Funcionais (FunNanoBio) e Materiais Quirais (ChiLab), ofrecendo unha mostra representativa da investigación de vangarda.
Esta iniciativa forma parte do compromiso do CINBIO coa difusión do coñecemento científico e a promoción das vocacións STEM, achegando á sociedade os avances dos seus laboratorios e demostrando que a ciencia pode experimentarse de forma directa, amena e accesible.
