A facultade de Ciencias Económicas e Empresariais da Universidade de Vigo acolleu esta mañá o relevo á fronte da institución. Carmen García Mateo, catedrática de Teoría da Señal e Comunicacións, recibiu o bastón de mando e a medalla da universidade de mans do seu predecesor, Manuel Reigosa.
Manuel Reigosa, visiblemente emocionado, pronunciou o seu último discurso como mandatario, agradecendo o traballo do seu equipo e da comunidade universitaria durante os últimos oito anos. Desculpouse polos "erros cometidos" e desexou á nova reitora "moitos acertos, porque iso será bo non só para a Universidade, senón tamén para Galicia."
A nova reitora, Carmen García Mateo, tivo palabras de recoñecemento para a súa homóloga compostelá, Rosa Crujeiras, presente no acto, sinalando que a súa presenza é un "retrato do que é a Galicia científica e universitaria do século XXI".
García Mateo definiu a UVigo como "unha universidade completa, diversa e comprometida co noso tempo" e animou a "seguir subindo escalóns" neste sentido. Destacou como retos principais para os próximos seis anos a "captación de talento, a estabilización e consolidación de grupos de investigación de altas capacidades e o fomento dunha ambiciosa interacción internacional".
Para acadar estes obxectivos, a reitora solicitou ao presidente da Xunta, Alfonso Rueda, quen presidiu a cerimonia, "financiamento e confianza", asegurando que "o retorno será maior que o investimento".
Alfonso Rueda pechou o acto, comprometendo o apoio do Goberno autonómico á nova etapa da universidade, afirmando que "estará ao voso lado".
