A xornada, promovida polo Concello de Mos dentro do programa Coidamos, deu continuidade á primeira edición celebrada en 2025. Nesta ocasión, a organización reforzou o contido sobre reciclaxe, reutilización e economía circular, mantendo un formato aberto e familiar.
A programación iniciouse pola mañá con actividades vinculadas á natureza, como unha andaina ao Monte de Louredo, iniciación á observación de aves e obradoiros de creación e reutilización de materiais. Tamén houbo contacontos e actividades infantís.
Os obradoiros ambientais ensinaron a separar residuos, reutilizar materiais e compostaxe, ademais de charlas sobre xestión de residuos no rural e un roteiro interpretativo pola contorna da Aldea Alfacuca.
A música e as propostas de rúa acompañaron a xornada, mentres que o picnic colectivo serviu como punto de encontro. Pola tarde, houbo xogos, maxia e animación.
O espazo “I Love Mascotas” estivo dedicado ao benestar animal e á adopción responsable, con participación de protectoras e actividades para nenos e nenas.
A sustentabilidade tamén marcou a organización, con dous stands de reciclaxe, illas de separación de residuos, vaixela reutilizable e o Punto Limpo Móbil. Estas medidas buscan fomentar a prevención e xestión de residuos, a reutilización e a economía circular.
O festival pechou unha xornada de convivencia na Aldea Alfacuca, combinando ocio e divulgación ambiental, como continuación da iniciativa nacida en 2025 para vincular este espazo natural con actividades para familias e veciñanza.
