A conselleira de Medio Ambiente e Cambio Climático, Ángeles Vázquez, e o alcalde de Bóveda (Lugo), José Manuel Arias, mantiveron unha reunión para analizar o proxecto municipal que busca acondicionar unha carballeira do municipio e convertela nunha área de lecer.
Durante o encontro, Ángeles Vázquez destacou a importancia de pór en valor estes espazos naturais, non só para a súa preservación, senón tamén para que sirvan como "refuxios climáticos" tanto para a poboación como para a biodiversidade.
A conselleira tamén animou o rexedor a solicitar as axudas anuais que a Consellería de Medio Ambiente convoca para apoiar aos concellos na súa adaptación á nova realidade climática.
Ademais, abordouse a situación da rede municipal de abastecemento de auga, subliñando ambos a necesidade de reducir as perdas. Ángeles Vázquez valorou positivamente que Bóveda xa conta cunha auditoría para cuantificar estas perdas, avaliar as infraestruturas e optimizar a eficiencia hidráulica.
O alcalde informou de que o Concello xa elaborou un documento técnico, actualmente en estudo polo persoal de Augas de Galicia, co obxectivo de mellorar a rede municipal e o servizo á veciñanza.
