O acordo, asinado este xoves 22 de outubro, busca fortalecer a capacidade científica da universidade galega e contribuír á captación e retención de talento investigador. A colaboración estenderase durante tres anos e permitirá o desenvolvemento de proxectos en áreas clave para Galicia como a agricultura sostible, a saúde animal, a alimentación, a xestión forestal, a biodiversidade e o desenvolvemento económico e social do medio rural.
Na sinatura estiveron presentes o vicerreitor de Coordinación do Campus de Lugo, Planificación Económica e Infraestruturas da USC, Roberto Bande Ramudo, e a directora do Campus Terra, Marta Miranda. Pola banda da Fundación, participaron o presidente, Tomás Notario Vacas, o presidente de Caixa Rural Galega e vicepresidente da Fundación, Manuel Varela López, e outros membros do Padroado como Alberto Cepeda Sáez.
Ademais da contratación de persoal investigador, o programa contempla a posibilidade de realizar estadías en centros de prestixio estatais e internacionais, co fin de favorecer a internacionalización da investigación e a adquisición de novas competencias científicas. Ambas as institucións subliñaron a importancia da colaboración entre universidade e sociedade para xerar coñecemento e atopar solucións innovadoras aos retos actuais.
A Fundación Caixa Rural Galega Tomás Notario Vacas achega un total de 171.783,36 euros a esta iniciativa, reafirmando o seu compromiso coa investigación, a formación e a innovación como motores do progreso económico e social de Galicia. O obxectivo é apoiar proxectos que impulsen o desenvolvemento do territorio e melloren a competitividade dos sectores produtivos galegos.
