O Diario Oficial de Galicia publica hoxe a incoación deste expediente, que supón a aplicación inmediata de medidas de salvagarda desta actividade. A cetraría, que xa conta co recoñecemento da Unesco como valor cultural universal desde 2010, ten unha continuidade histórica de preto de 4.000 anos.
O expediente, elaborado polos técnicos da Consellería de Cultura, Lingua e Xuventude, destaca os valores históricos, culturais e sociais da cetraría, acreditados por informes favorables da Universidade de Santiago de Compostela e o Instituto de Estudos Galegos Padre Sarmiento. Sublíñase a súa prolongada continuidade histórica en Europa e a súa pegada na cultura da nobreza galega durante a Idade Media.
Na actualidade, a cetraría ten unha finalidade pública e de interese social, servindo como método de control biolóxico en aeroportos e cultivos, ademais de ter usos pedagóxicos e terapéuticos para persoas con sensibilidades especiais. Existe en Galicia unha comunidade organizada que mantén a transmisión de técnicas tradicionais e promove o coñecemento desta práctica.
Este procedemento, que deberá resolverse nun prazo máximo de 24 meses, reflicte o compromiso do Goberno galego na protección do patrimonio máis senlleiro da Comunidade, sumándose aos 799 bens declarados desde a entrada en vigor da Lei de Patrimonio Cultural de 2016.
