O presidente da Xunta, Alfonso Rueda, mantivo unha reunión institucional co embaixador do Reino Unido en España, Alex Ellis, na que destacou a solidez dos intercambios económicos bilaterais entre Galicia e o Reino Unido, que manteñen un saldo positivo constante para a comunidade autónoma.
O encontro tivo lugar no Grove, no marco do Foro La Toja-Vínculo Atlántico. Nel, ambas as partes intercambiaron impresións sobre a situación xeopolítica actual e repasaron as relacións comerciais. Rueda puxo en valor a posición de Galicia como un socio industrial e comercial fiable e competitivo no contexto europeo e internacional.
Así mesmo, abordáronse as oportunidades de cooperación económica e industrial en sectores estratéxicos para o tecido produtivo galego, como a automoción e compoñentes, o ámbito agroalimentario, a industria naval, as enerxías renovables e a biotecnoloxía.
Con vistas ao Xacobeo 2027, o presidente da Xunta e o embaixador tamén trataron os profundos vínculos culturais e turísticos que unen ambos territorios a través do Camiño de Santiago. Rueda sinalou que os peregrinos estranxeiros xa representan a maioría dos camiñantes, sendo o Reino Unido o sexto país de procedencia con máis de 13.000 compostelas rexistradas este ano. Convidou a aproveitar o Ano Santo para seguir estreitando lazos.
