O conselleiro de Facenda e Administración Pública, Miguel Corgos, explicou hoxe na Comisión 3ª do Parlamento o proxecto de Lei de Orzamentos Xerais da Comunidade Autónoma para o vindeiro ano. Destacou que a conxelación de taxas e prezos públicos suporá un aforro conxunto de 1,1 millóns de euros. A estratexia do Goberno galego combina a responsabilidade financeira coa mellora da situación dos fogares e o reforzo do crecemento de Galicia nun escenario de inflación elevada.
Corgos subliñou que as medidas tributarias xa aprobadas, como a dedución de 500€ por arrendamento de vivendas baleiras e a rebaixa do 15% nos gastos de reparación e conservación, puxeron máis de 500 vivendas no mercado de aluguer este ano. Tamén lembrou as rebaixas fiscais consolidadas no IRPF, que sitúan a Galicia entre as CC.AA. con mellor tratamento fiscal para rendas medias e baixas.
Para o vindeiro ano, os novos alivios fiscais buscan abaratar os impostos da vivenda, cunha rebaixa de 0,3 puntos na cota do Imposto de Actos Xurídicos Documentados para trámites previos á entrega da vivenda. Ademais, amplíase a redución do 99% no Imposto de Sucesións para facilitar o relevo en empresas familiares, estendéndose a parentes de terceiro grao e traballadores con antigüidade.
Estas rebaixas súmanse ás xa en vigor que, entre 2020 e 2025, permitiron aforrar aos galegos case 2.100 M€. Os beneficios fiscais para o vindeiro ano sumarán 812M€, case o 90% de carácter social. Os orzamentos de 2027, cunha capacidade de gasto de 15.158 M€ (un 6,4% máis), están deseñados para dar seguridade a familias e empresas fronte á alza de prezos e tipos de xuro, sen recorrer ao endebedamento.
O conselleiro tamén anunciou a avaliación intermedia do Plan Estratéxico de Galicia 2030 e detallou as contas do seu departamento, incluíndo a modernización da Función Pública, a convocatoria de máis de 4.000 prazas para 2027, unha xestión prudente da débeda pública e a adaptación ao novo Plan de Contabilidade Pública. En materia de Fondos Europeos, buscarase preparar o período 2028-2034 e impulsar a execución do marco 21-27.
En Simplificación Administrativa, continuará a redución de cargas e a Estratexia Galega de Contratación Pública. En Patrimonio, preténdese rebaixar un 10% adicional o importe dos arrendamentos. A Axencia Tributaria de Galicia (ATRIGA) aposta pola asistencia dixitalizada e a Escola Galega de Administración Pública (EGAP) aumentará a oferta formativa.
A Axencia para a Modernización Tecnolóxica de Galicia (Amtega) implantará un modelo de goberno da Intelixencia Artificial e ampliará as aulas CeMIT. O selo ‘Galicia Calidade TIC’ recoñecerá empresas innovadoras e mellorarase a resiliencia da rede. Destinaranse máis de 14 M€ á ciberseguridade e dotarase o Centro de Excelencia en Ciberseguridade de Galicia (CECIGA) en Ourense.
