A iniciativa, que se desenvolveu na Sala de Graos da Facultade de Filoloxía, foi inaugurada pola vicerreitora de Investigación e Ciencia Aberta, Almudena Hospido Quintana, xunto ao decano de Filoloxía, Elias Feijo Torres, e a directora do iLTIUS, María José Alonso Veloso. O programa incluíu mesas de divulgación e continuará cunha mesa e un obradoiro práctico.
Segundo sinalou a directora do iLTIUS, Ciencia con Letras nace "como un espazo consagrado a presentar o amplo abano de proxectos, individuais ou grupais, que están en marcha no iLTIUS". Subliñou a importancia de que os membros do Instituto se coñezan mellor para "albiscar posibles colaboracións entre grupos de áreas diferentes", xa que "só sabendo o que facemos seremos quen de transferilo a outros ámbitos".
María José Alonso Veloso destacou a riqueza do programa, que representa "once expresións filolóxicas do papel indispensable que as humanidades xogan e deben asumir no mundo actual". Tamén reivindicou o papel das humanidades na ciencia, afirmando que "os estudos arredor das Letras, das Linguas e as súas manifestacións culturais son Ciencia, e a ciencia precisa das letras para estar completa na súa función de servizo á sociedade".
A directora tamén mencionou actividades recentes de apoio ao persoal investigador, como estadías no estranxeiro para dúas investigadoras e bolsas de verán para catro estudantes de Lingüística e Literatura.
Ademais, o iLTIUS promoverá en novembro unha mesa redonda sobre Intelixencia Artificial e humanidades dixitais, abordando os seus riscos e oportunidades nas investigacións lingüísticas e literarias, ante o interese e preocupación que suscita o tema.
