O alcalde, Ángel Moldes, e a concelleira de Promoción Económica, Maritxe González, entregaron os diplomas ás catorce participantes que completaron as 100 horas de formación neste curso, organizado en colaboración coa Fundación Acción contra el Hambre. Dúas das alumnas xa atoparon emprego.
Moldes felicitou ás asistentes polo seu esforzo e destacou a importancia de ofrecer oportunidades formativas que faciliten o acceso ao mercado laboral, sinalando que é "unha sorte e unha oportunidade incrible poder acceder a unha formación acreditada e recoñecida polas empresas, preto da casa e de xeito totalmente gratuíto".
Moldes felicitou ás asistentes polo seu esforzo e destacou a importancia de ofrecer oportunidades formativas que faciliten o acceso ao mercado laboral, sinalando que é "unha sorte e unha oportunidade incrible poder acceder a unha formación acreditada e recoñecida polas empresas, preto da casa e de xeito totalmente gratuíto".
A utilidade destas iniciativas reflíctese nos resultados de inserción laboral. Dúas das participantes xa están traballando, o que demostra as oportunidades que ofrece a formación especializada. Durante 2025, o Concello de Poio formou a un total de 31 persoas en diferentes cursos, co 75% das alumnas traballando actualmente ou desenvolvendo unha actividade laboral continuada nos sectores nos que se formaron. No curso de dependente polivalente deste 2026, preto do 60% das trece persoas que o completaron incorporáronse ao mercado laboral.
O Concello continuará ampliando a súa oferta formativa con novas propostas orientadas a mellorar a empregabilidade da veciñanza. De feito, hoxe mesmo deu comezo un curso en liña de monitor de comedor e transporte escolar, no que participan quince persoas.
Ademais, o alcalde animou ás participantes a seguir aproveitando os recursos do Concello para facilitar a busca de emprego, como o Servizo de Intermediación Laboral e o perfil EmpregoenPoio nas redes sociais. Estas ferramentas, postas en marcha en 2024, están consolidadas como vía de contacto entre persoas que buscan traballo e empresas que precisan incorporar persoal, recibindo ofertas de toda a provincia.
