O evento, que busca recrear os mercados de Nadal europeos, contará con vinte postos por quenda e está dirixido a persoas artesás, comerciantes e entidades sen ánimo de lucro. As solicitudes poden presentarse ata o xoves 12 de novembro.
Haberá tres quendas de participación: do 4 ao 13 de decembro, do 14 ao 24 de decembro e do 26 de decembro ao 5 de xaneiro. Priorizaranse os produtos específicos de Nadal, alimentación, gastronomía, artesanía e decoración.
Os interesados deberán cubrir o formulario en liña dispoñible en tui.gal e enviar tres fotografías do produto a mercadonadaltui@gmail.com. As persoas seleccionadas deberán depositar unha fianza de 150€.
O mercado abrirá de luns a venres de 17 a 21 h; os sábados, vésperas e festivos de 12 a 14 h e de 17 a 21h; e os domingos de 11 a 14 h e de 17 a 21h. Os días 24 e 31 de decembro o horario será de 11 a 14 h, e o 5 de xaneiro de 11 a 18 h.
Ademais do mercado, o Concello de Tui organizará unha programación de Nadal con carrusel, tren turístico entre Tui e Valença, decoración especial nas rúas e outras actividades de animación para todos os públicos.
Estas iniciativas buscan impulsar o comercio local, atraer visitantes e dinamizar a economía da cidade, convertendo o Mercado de Nadal nun punto de encontro festivo.
