A resolución, publicada no Diario Oficial de Galicia, detalla a relación definitiva de persoas admitidas e excluídas, así como a adxudicación provisional de prazas para persoal estatutario sanitario e de xestión e servizos. Un total de 312 profesionais conseguen o seu primeiro destino solicitado, o que representa o 53% das adxudicacións outorgadas neste proceso.
Ademais, 111 profesionais que dispoñen dunha praza en propiedade fóra do Sistema Público de Saúde de Galicia tamén resultaron adxudicatarios provisionais. Deles, 33 xa traballan provisionalmente en centros sanitarios galegos en comisión de servizos.
A categoría de enfermería foi a que rexistrou maior número de participantes, con 1.185 persoas admitidas e 165 adxudicatarias. Seguenlle o técnico en coidados auxiliares de enfermería (479 participantes, 82 adxudicatarios) e médico de familia (225 participantes, 71 adxudicatarios).
Este é o noveno ciclo do concurso de traslados, posto en marcha en 2017, que busca facilitar a mobilidade do persoal fixo e a conciliación da vida laboral e familiar, cunha periodicidade anual.
As listas completas, puntuacións e destinos provisionais están dispoñibles na páxina web do Sergas e no expediente electrónico persoal en Fides/expedient-e. Os interesados teñen dez días hábiles para presentar reclamacións contra os resultados provisionais.
