A directora xeral de Patrimonio Natural, Marisol Díaz, mantivo hoxe en Santiago unha reunión con representantes de dúas asociacións de veciños con propiedades no Parque Natural Fragas do Eume. O encontro serviu para defender o modelo de xestión do parque, baseado no Plan reitor de uso e xestión (PRUX) aprobado en 2023 e avalado recentemente pola Xustiza galega.
Díaz lembrou que o Tribunal Superior de Xustiza de Galicia (TSXG) ditou varias sentenzas nos últimos meses que recoñecen a participación pública na elaboración do PRUX e o feito de que non se prevén indemnizacións xerais aos propietarios de terreos. Non obstante, trasladou aos representantes a vontade de diálogo da Xunta e a disposición a estudar fórmulas alternativas, non económicas, para que os propietarios poidan aproveitar os seus terreos mentres se garante o uso público e a protección medioambiental.
A responsable autonómica explicou que as restricións inherentes á protección de espazos naturais non xeran un dereito automático a compensación económica, agás que se constaten perdas reais de aproveitamento. Ofreceu aos propietarios a posibilidade de achegar documentación sobre casos particulares para a súa análise individualizada polos técnicos da Consellería.
Destacou que preto do 60% da superficie do parque está cualificada como de uso xeral ou compatible, sen limitacións apreciables de aproveitamento. Ademais, a Consellería de Medio Ambiente e Cambio Climático mantén activo un programa de compra de parcelas privadas a prezos obxectivos, co que xa se adquiriron máis de 120 hectáreas. O obxectivo desta iniciativa é reforzar a superficie pública nun espazo onde o 80% dos terreos son de titularidade privada.
