O Concello da Guarda lanzou unha chamada á concienciación e á colaboración cidadá para promover un uso responsable do sistema de saneamento. A práctica de desbotar toallitas, papel hixiénico húmido e outros materiais polo inodoro está a xerar importantes problemas no funcionamento das instalacións municipais.
Durante o verán, a limpeza semanal dos filtros do sistema de saneamento volveuse insuficiente. Nas últimas semanas, detectáronse atrancos e acumulacións de residuos que obrigan a realizar estas tarefas ata dúas veces por semana, superando o habitual.
A presenza destas toallitas e outros materiais provoca a formación de tapóns, dificultando o labor normal das instalacións. Esta situación pode derivar en vertidos, avarías e danos nos compoñentes do sistema, ademais de supoñer un considerable custo económico para as reparacións necesarias, como a recente intervención nunha das bombas.
O Concello recorda que, aínda que algúns produtos se publiciten como "biodegradables" ou "aptos para o inodoro", non se desfan tan facilmente como o papel hixiénico convencional. Poden acumularse ao longo do percorrido, causando atrancos e afectando o funcionamento xeral.
Do mesmo xeito, o papel hixiénico húmido tampouco é recomendable tiralos polo inodoro, xa que o seu tempo de disolución é superior ao necesario para percorrer o sistema de saneamento, contribuíndo tamén á formación de tapóns.
Esta problemática tamén ten unha importante dimensión ambiental. Os residuos que chegan ao sistema poden causar vertidos, impactando negativamente no medio ambiente e incrementando os recursos necesarios para o mantemento das instalacións.
Por iso, dende o Concello da Guarda solicítase a responsabilidade da veciñanza, lembrando que polo inodoro só debe desbotarse papel hixiénico. Toallitas, papel húmido, produtos de hixiene, algodóns, bastoncillos e outros residuos deben ser depositados no colector axeitado.
O Concello manterá as tarefas de supervisión e limpeza, pero subliña que a prevención e a colaboración cidadá son fundamentais para evitar problemas no funcionamento da rede de saneamento.
