A Conselleira do Mar, Marta Villaverde, e o xerente da Fundación Rof Codina, Antonio González Cantalapiedra, asinaron un convenio de colaboración para impulsar un proxecto científico-técnico centrado na nutrición, a seguridade alimentaria e os produtos do mar. O estudo avaliará alimentos de especial interese, como determinadas especies de túnidos, pola súa relevante composición nutricional.
A titular de Mar destacou a aposta da Xunta pola investigación independente con selo galego como ferramenta para reforzar o coñecemento sobre produtos pesqueiros e protexer a confianza dos consumidores. O proxecto será desenvolvido polo grupo FARMATOX da Universidade de Santiago de Compostela (USC), liderado polo catedrático de Farmacoloxía Luis Miguel Botana, recoñecido internacionalmente en seguridade alimentaria e toxicoloxía.
A iniciativa conta cun investimento total de 648.775,60 euros, achegado ao 50 % pola Fundación Rof Codina e pola Consellería do Mar, cofinanciado parcialmente polo Fondo Europeo Marítimo, de Pesca e de Acuicultura (FEMPA). A investigación estenderase ata maio de 2027 e empregará metodoloxías científicas para analizar a interacción entre micronutrientes esenciais dos produtos mariños e procesos biolóxicos clave como a resposta inflamatoria e o estrés oxidativo.
A Xunta busca obter datos propios e rigorosos para orientar políticas públicas, anticiparse a riscos emerxentes e deseñar recomendacións nutricionais baseadas en evidencia científica, contribuíndo a actualizar protocolos e informar a cidadanía.
A conselleira subliñou que a industria conserveira e o complexo mar-industria de Galicia son piares económicos que cumpren esixencias de calidade e seguridade. "Coa ciencia de vangarda como aliada, debemos combater a desinformación e evitar alarmismos innecesarios que prexudiquen sen base científica a confianza nos nosos produtos do mar", afirmou.
Esta investigación ten unha relevancia estratéxica nunha comunidade como Galicia, líder europea en transformación e conservación de produtos do mar, que xera máis do 50 % da facturación nacional de produtos conxelados e máis de 50.000 empregos no sector marítimo-pesqueiro.
