As actuacións centrarase na mellora e conservación de distintos treitos da vía de altas prestacións VG.-1.4 (Cee-Sardiñeiro), así como nas estradas AC-404 (Santa Comba-Baio), AC-429 (Ponteceso-Laxe), AC-440 (Berdoias-Muxía), AC-444 (Negreira-Ponte Failde), AC-546 (Negreira- A Pereira), AC-550 (Cee-Ribeira) e a AC-552 (A Coruña-Cee).
Estas intervencións abranguen os municipios da Baña, Cabana de Bergantiños, Cee, Fisterra, Laxe, Muros, Muxía, Santa Comba, Vimianzo e Zas. O obxectivo principal é mellorar as características funcionais e reforzar a seguridade viaria nestes treitos.
Os traballos, que contan cun prazo de execución estimado de seis meses, consistirán na rehabilitación superficial do firme para restaurar as súas características e adecualas ás necesidades funcionais e de durabilidade. En conxunto, actuaranse en preto de 65 quilómetros de lonxitude.
A Consellería de Infraestruturas e Mobilidade, dirixida por M. Allegue, reafirma así a súa aposta pola mellora da rede viaria autonómica, buscando un menor custo de mantemento a longo prazo e un incremento da seguridade para os usuarios.
