Esta iniciativa, cofinanciada pola Unión Europea no marco do programa Galicia Feder 2021-2027, busca incrementar a eficiencia na xestión dos residuos orgánicos municipais. O obxectivo é facilitar á veciñanza ferramentas para unha xestión máis sostible desde os propios fogares, transformando os residuos en compost útil para hortas e xardíns.
O alcalde, Manu Lourenzo, destacou que a compostaxe doméstica é un exemplo de como pequenas accións individuais contribúen ao coidado do municipio. Sinalou que se está a recuperar e actualizar unha práctica tradicional do rural galego, adaptándoa cun sistema máis cómodo, hixiénico e eficiente.
Pode acceder a esta iniciativa toda persoa que resida nunha vivenda illada cunha parcela ou horta dun mínimo de 25 m². As solicitudes poden realizarse online escaneando un código QR ou chamando ao teléfono do Concello: 986 705 106, extensión 01.
Cada composteiro ten unha capacidade de 400 litros e debe instalarse no exterior da vivenda, preferiblemente nunha zona sombreada, protexida das inclemencias meteorolóxicas e en contacto directo coa terra para facilitar a entrada de microorganismos descompoñedores.
Coa campaña, o Concello busca pór en valor as vantaxes ambientais, económicas e sociais da compostaxe, reafirmando o seu compromiso coa xestión sustentable dos residuos e a mellora ambiental do municipio.
