A Xunta de Galicia colabora coa Feira das San Lucas, un evento que terá lugar en Mondoñedo entre o 16 e o 25 de outubro. O delegado territorial, Alfonso Villares, participou na presentación da programación desta celebración, organizada polo Concello e a Asociación As San Lucas, que xa conta co recoñecemento de Feira de Interese Turístico de Galicia.
Villares destacou a longa historia e a singularidade da feira, que este ano chega á súa 870ª edición. Lembrou tamén que a Administración autonómica, a través de Turismo de Galicia, informou favorablemente a solicitude do Concello de Mondoñedo para a súa declaración como Festa de Interese Turístico Nacional. Este recoñecemento pon en valor os compoñentes históricos, culturais, tradicionais e turísticos da celebración tras comprobar o cumprimento dos requisitos establecidos.
A feira comezará o venres 16 co pregón de Luis Rego Valcarce, avogado e ex alcalde de Mondoñedo, no auditorio municipal Pascual Veiga ás 20:30 horas. A celebración mantén a súa esencia, outorgando un protagonismo especial aos cabalos con citas como a baixada polas rúas o sábado 17 e a Gran Feira de Gando Cabalar o domingo 18, ademais de concursos morfolóxicos e espectáculos de doma nocturna.
No apartado musical, destacan os concertos de Keepers e The Rapants o sábado 17 na praza do Seminario, e de Abraham Cupeiro o domingo 18 na Catedral mindoniense. Ademais, haberá verbenas nocturnas e outras propostas culturais como o monólogo de David Perdomo o venres 23.
