O municipio de Chantada sufriu cortes na subministración eléctrica durante a tarde do 11 e a madrugada do 12 de xuño, así como na tarde e madrugada dos días 14 e 15 de xuño. Tras unha providencia de Alcaldía do 15 de xuño, solicitando datos a Naturgy, a empresa remitiu informes técnicos e da Policía Local que detallan as causas das incidencias.
Segundo o rexistro de incidencias de Naturgy, o día 11 de xuño ás 21:23 rexistrouse unha avaría (Cod 621045477) na liña de Media Tensión Chantada 804, orixinada pola caída dun raio. Esta incidencia, que durou 235 minutos, afectou a 27 centros de transformación e a 3658 subministracións en Chantada, Lamarín, Santa Mariña e Chouso.
A empresa asegura que a xestión da incidencia foi correcta, xa que as proteccións actuaron para protexer persoas e instalacións. A causa, allea á empresa, foi debida ás condicións climatolóxicas adversas. Naturgy engade que se tomaron as medidas de seguridade necesarias e que os traballos se realizaron no menor tempo posible, mesmo en horario nocturno.
Unha segunda incidencia (Cod 621045564) ocorreu o 14 de xuño ás 23:43, tamén na liña Chantada 804, con orixe nas fortes tormentas e unha duración de 329 minutos, afectando ás mesmas poboacións. Naturgy sinala que a demora na recuperación do servizo débese a que a liña estaba illada por unha avaría na zona de anelamento de dúas instalacións, danos causados por traballos de terceiros alleos á empresa.
En canto aos investimentos, Naturgy informa que entre 2022 e 2025 investiu na rede de alta tensión preto de 4.800.000€ e na de media tensión 1.161.805€. Ademais, destináronse máis de 600.000€ ao plan de mantemento.
A empresa conclúe que ambas incidencias foron puntuais e motivadas por causas alleas á rede de distribución, acreditando o cumprimento da calidade de subministración e o seu compromiso coa mellora do servizo eléctrico no municipio.
O Concello de Chantada agradeceu as explicacións da empresa ás demandas presentadas, aínda que esperaba unha resposta máis rápida.
