A expedición, promovida pola Fundación Galifornia, parte dende Chantada, punto elixido por ser o "Corazón de Galicia", segundo os organizadores. Agradecen a colaboración do Concello de Chantada nesta iniciativa que busca fusionar a paixón polas dúas rodas co intercambio de experiencias de viaxe, realzando o patrimonio cultural, humano e rural das zonas percorridas, ademais de fomentar o goce da gastronomía local.
A camiseta desta edición reza "Galicia-Asturias-León e Santas Pascuas". O medio cento de motocicletas participantes chegaron este xoves á vila do Asma para un encontro e cea de confraternidade. Este venres, o percorrido inclúe a Ribeira Sacra e as súas paisaxes, seguido da Reserva da Biosfera dos Ancares, con portos de montaña esixentes.
En Asturias, a ruta atravesará as estradas de montaña do Val dos Oscos. Tras ascender os cumes do norte, descenderán por terras leonesas cara o Val do Silencio, culminando na comarca da Maragatería. A xornada final será o 6 de setembro cunha comida de fraternidade en Parada de Sil.
