O presidente da Xunta, Alfonso Rueda, anunciou hoxe o inicio da elaboración do futuro Plan estratéxico para o reforzo da eficiencia e da garantía do abastecemento de Galicia (PEREGA). O obxectivo é analizar cunha visión conxunta os principais sistemas, actualizar o seu diagnóstico e identificar e priorizar as solucións máis axeitadas para reforzar a subministración a medio e longo prazo.
Este traballo estratéxico, cuxos resultados servirán de base para a revisión do Plan xeral galego de abastecemento, partirá do Plan de abastecemento de Galicia e incorporará a situación actual dos sistemas, as actuacións executadas, a evolución das demandas e a nova realidade climática, marcada pola maior irregularidade das precipitacións.
A Xunta xa está a mobilizar máis de 61 millóns de euros para mellorar o aproveitamento da auga dispoñible e das infraestruturas existentes, cun horizonte ata 2029. Augas de Galicia apoia aos concellos para reducir perdas nas redes e mellorar o control de consumos, con axudas concedidas e convocatorias abertas. Tamén se invisten fondos na modernización e renovación de infraestruturas como potabilizadoras, depósitos e conducións.
A planificación tamén prevé o reforzo da regulación, o estudo de augas subterráneas e a análise da reutilización de auga rexenerada para diversos usos, co fin de preservar a auga potable. Ademais, estudarase a creación de novas interconexións entre sistemas supramunicipais para prestar apoio en situacións de seca ou escaseza, e, cando sexa xustificado, novas infraestruturas de almacenamento.
Rueda lembrou que o risco de escaseza de auga é real, como demostran os problemas conxunturais deste verán en varios sistemas galegos, e subliñou a necesidade de "redobrar os esforzos" para un uso prudente e axeitado deste recurso prezado.
