Na xuntanza tamén participaron a primeira tenente de alcalde, Inés López Couto, e o xefe da Zona Norte – Lugo de Portos, Antonio Fernández. Abordáronse temas cruciais como a dragaxe do peirao de Foz, a reversión de terreos portuarios ao Concello, a ampliación do peirao de Porto Chico e a conservación do firme da explanada portuaria.
En canto á dragaxe do porto, Portos de Galicia xa encargou o proxecto construtivo, cun investimento previsto de 1 millón de euros para unha actuación inicial e catro de mantemento. Segundo informou o alcalde, están pendentes de recibir as autorizacións de navegación e verquido para sacar a licitación o contrato. Sobre a ampliación de Porto Chico, expúxose o traballo da Asociación A Ribeira e solicitouse a contratación do anteproxecto e estudo de impacto ambiental.
Respecto á transferencia de terreos da explanada portuaria, Portos de Galicia iniciou o proceso de reversión tras declarar innecesarios para usos portuarios os terreos entre o Clube Kayak e a piscina municipal. O alcalde xa se reuniu co Xefe da Demarcación de Costas de Galicia, Carlos Gil, para axilizar este proceso. Espérase poder xestionar o cobro polo uso do punto de auga e descarga de augas negras mentres se resolven os trámites de reversión.
Ante o mal estado dos viais e da explanada portuaria, acordouse explorar unha vía de colaboración entre administracións para o seu arranxo urxente, xa que a responsabilidade é do ente autonómico. Presentarase unha nova solicitude formal para definir un convenio de colaboración.
Ademais, tratouse a demanda de conservar o edificio da actual depuradora de augas residuais e a fábrica de xeo, ambos previstos para demolición. Portos de Galicia comprometeuse a estudar a viabilidade xurídica da conservación destes edificios. O Concello de Foz faríase cargo do traslado e reubicación do mural das pescantinas de Xosé Vizoso ante a posible demolición do edificio da depuradora.
O alcalde Fran Cajoto agradeceu a cordialidade e dilixencia da presidenta de Portos de Galicia na convocatoria da reunión e invitouna a visitar Foz. Tamén se expuxo a necesidade de que Portos de Galicia execute unha inversión de calado no espazo que continuará baixo a súa titularidade, fronte ás casetas.
