A directora xeral de Ordenación e Innovación Educativa, Judith Fernández, visitou o Colexio Plurilingüe de Tarrío, situado en Culleredo, co obxectivo de avaliar as iniciativas que o centro está a desenvolver no ámbito da internacionalización e da promoción de linguas estranxeiras. A representante da Consellería de Educación, Ciencia, Universidades e FP puido constatar o traballo realizado polo equipo docente a través de diversos programas educativos que buscan a apertura internacional do alumnado e a mellora do seu nivel de idiomas.
Entre os proxectos máis salientables, segundo informou a Xunta, atópase o programa eTwinning 'Let’s sing together'. Este proxecto foi galardoado o pasado curso co selo de calidade nacional outorgado polo Instituto Nacional de Tecnoloxías Educativas e de Formación do Profesorado (Intef), tras acadar unha puntuación destacada.
“"Este galardón situou o centro entre os máis sobresaíntes do conxunto do estado, o que lle valeu tamén a participación na Conferencia Nacional eTwinning 2026, baixo o lema 'Skills for life'."
Ademais, o colexio continúa a impulsar novas iniciativas como 'Wonderful World' e participa activamente na proposta 'Centros Referentes', consolidando así o seu compromiso coa innovación educativa e a proxección internacional.
