A cita, coordinada desde Ferrol polos grupos de Polímeros e PROTERM do Centro de Investigación en Tecnoloxías Navais e Industriais (CITENI) da Universidade da Coruña (UDC), abordará durante tres xornadas os últimos avances no estudo do comportamento de materiais e fluídos e as súas aplicacións en ámbitos como a alimentación, a enerxía ou a industria.
O congreso arrancou esta mañá no Salón de Actos Concepción Arenal, coa participación do reitor da UDC, Ricardo Cao; a directora do CITENI, Belén Montero; o presidente do Grupo Español de Reoloxía, José Muñoz; e a presidenta e coordinadora do congreso, Ana Ares.
A reoloxía, que estuda como se deforman e flúen os materiais, permite caracterizar substancias, optimizar procesos e desenvolver produtos con propiedades específicas. As súas aplicacións abarcan desde a alimentación e a biomedicina ata a enerxía e diversos sectores industriais.
No programa de IBEREO 2026 conflúen investigacións sobre alimentación e biorreoloxía, procesamento industrial, polímeros, novas técnicas de medida e estudo de fluídos complexos, con aplicacións que van desde a impresión 3D ata as baterías de estado sólido.
Presentaranse preto de 80 contribucións científicas, entre 40 comunicacións orais e 39 pósteres, reunindo case un centenar de persoas de 12 nacionalidades. Destaca o apoio de 12 empresas colaboradoras.
A primeira conferencia plenaria correu a cargo de Simon Rogers (University of Illinois Urbana-Champaign), sobre recovery rheology. O xoves, Ruth Cardinaels (Eindhoven University of Technology e KU Leuven) falará sobre rheo-scattering e rheo-spectroscopy.
Investigacións sobre a caracterización reolóxica de materiais ricos en proteínas para a impresión 3D de alternativas vexetais á carne ou o desenvolvemento dun dispositivo de baixo custo para estudar o comportamento de fluídos complexos son algunhas das intervencións destacadas.
O CITENI ten unha presenza salientable en IBEREO 2026 a través dos grupos de Polímeros e PROTERM. Ramón Artiaga, María José Abad, Jorge López Beceiro e Ana Díaz conducirán sesións científicas, mentres que Ana Ares exerce a coordinación local.
A actividade científica complétase cun programa social que inclúe un percorrido en barco pola ría de Ferrol, un cóctel de benvida en Exponav, unha cea de gala e unha visita a Santiago de Compostela.
