O director xeral de Patrimonio Cultural, Ángel Miramontes, anunciou este venres que a Xunta de Galicia está a desenvolver o "mellor método para protexer os murais" de Urbano Lugrís na Coruña, co obxectivo de "evitar que se vexan afectados polas futuras obras no local" onde se atopan.

A principal proposta consiste en illar a planta baixa do edificio onde se localizan as pinturas, a modo de "cápsula", para salvagardar as doce pezas, realizadas en febreiro de 1951, de filtracións de auga e outras posibles afeccións derivadas do progresivo deterioro do inmoble.

Estas obras, executadas coa técnica 'a secco' e pintura ao óleo, son propiedade da Xunta de Galicia e atópanse nos números 25 e 27 da rúa Olmos, pendentes de rehabilitación e musealización.

A iniciativa da Xunta responde ás críticas da deputada do BNG Mercedes Queixas, quen acusou o Goberno galego de "incumprir" as súas obrigacións e de manter as obras "secuestradas nun edificio en ruínas por o abandono institucional".

Fronte a estas acusacións, Miramontes detallou as actuacións levadas a cabo dende 2024, que inclúen estudos históricos, artísticos e estruturais, análise dos materiais pictóricos, levantamentos tridimensionais de alta precisión e a elaboración dun diagnóstico completo con proposta de intervención. Tamén se realizaron traballos de toma de datos 3D e un estudo construtivo e estrutural do edificio.

Ademais, analizáronse os estratos policromados, fixando aqueles en risco de desprendemento e executando outras actuacións puntuais de urxencia. En 2026 continúan as labores de control, seguimento e conservación preventiva.

Ángel Miramontes lembrou o compromiso da Xunta coa recuperación e posta en valor dos murais dende a súa adquisición en 2024, aínda que a titularidade do edificio é privada. A principal dificultade, recalcou, reside no estado do inmoble e nos atrasos na obtención de licenzas urbanísticas por parte da propiedade.