O Concello de Soutomaior conmemorou este domingo, 8 de novembro, o acto institucional «A Rúa da Dignidade», unha homenaxe a Alexandre Bóveda e á decisión histórica adoptada en 1979 polo goberno municipal, encabezado polo daquela alcalde Fernando Pereira, de dedicarlle unha rúa ao histórico galeguista. Esta iniciativa converteu Soutomaior no primeiro concello do mundo en levar o nome de Alexandre Bóveda ao rueiro, un xesto que case cinco décadas despois continúa sendo un símbolo de memoria, compromiso e dignidade.
O evento, enmarcado no III Foro da Memoria Histórica de Soutomaior, contou coa participación da concelleira de Memoria Histórica, Silvia Cernadas; do alcalde, Manu Lourenzo; e de Amalia Bóveda, filla de Alexandre Bóveda e presidenta honorífica da Fundación Alexandre Bóveda. A xornada iniciouse cun acto no concello coa colocación dunha placa de pedra co nome do galeguista, e posteriormente trasladouse á Casa da Cultura Rexina Míguez Noval.
Durante a súa intervención, Silvia Cernadas destacou a importancia de recuperar tamén a memoria de quen fixo posible aquela decisión, especialmente a figura de Fernando Pereira, primeiro alcalde da democracia en Soutomaior. «Todas as homenaxes quedan curtas para recoñecer o traballo de Pereira. Foi unha persoa que abriu camiños e que trouxo de Montevideo ideas progresistas, tamén no ámbito do ensino», sinalou a concelleira, lembrando outras iniciativas daquela etapa como a creación da biblioteca municipal, nomeada Luís Seoane, ou o Premio Lois Peña Novo.
“"Cada vez que chego a Soutomaior e miro a rúa Alexandre Bóveda, estou na verdadeira Rúa da Dignidade."
Amalia Bóveda agradeceu ao Concello que manteña viva a memoria do seu pai e subliñou o significado daquel xesto de 1979. Explicou que, para unha familia que soportou o peso do silencio durante corenta anos, Soutomaior ocupa «un lugar sagrado no noso corazón». Destacou a valentía do Concello ao adoptar aquela decisión nos primeiros pasos da democracia, afirmando que «este Concello tivo unha valentía enorme. Cando un concello pon o nome de Alexandre Bóveda a unha rúa está adquirindo un compromiso: defender que a honestidade e o rigor non se negocian».
Outro momento emotivo foi a lectura da carta de despedida de Alexandre Bóveda, a cargo do escritor e narrador Celso Fernández Sanmartín, «Celsiño». O alcalde, Manu Lourenzo, pechou o acto reivindicando a figura de Fernando Pereira e a súa importancia na configuración do galeguismo e do nacionalismo. Lourenzo subliñou que a memoria histórica debe servir para entender o presente e evitar erros pasados, destacando o valor das últimas palabras de Alexandre Bóveda fronte á barbarie.
O acto forma parte do III Foro da Memoria Histórica, que inclúe tamén unha mesa redonda sobre o legado do galeguista e un espectáculo de danza contemporánea. O Concello busca así manter vivo o debate arredor da memoria, a identidade e a defensa dos valores democráticos.
