A actuación, financiada polo III Plan Extraordinario de Infraestruturas Deportivas da Deputación de Pontevedra, foi adxudicada á empresa Suministros Integral del Agua S.L. e transformará a actual pista de tenis nunhas instalacións modernas e funcionais.
O proxecto inclúe non só a creación das tres pistas de pádel, senón tamén a ampliación da bancada lateral e da cuberta existente, adaptándoas ás novas dimensións. Ademais, executarase unha nova bancada de formigón con asentos de madeira e realizaranse traballos de cerramento e adecuación xeral do espazo.
O alcalde, Manu Lourenzo, destacou que esta iniciativa responde á crecente demanda da veciñanza e supón un paso máis na modernización das instalacións deportivas municipais. Subliñou o compromiso do Concello co deporte como servizo público fundamental, facilitando a práctica de actividade física en boas condicións preto das casas.
A mellora do complexo deportivo da Montesiña, que xa conta cun pavillón polideportivo, vestiarios, pistas de tenis e pádel e unha pista de pickleball, incrementará significativamente a capacidade para a práctica do pádel e facilitará a organización de adestramentos, torneos e competicións.
