A Universidade de Vigo estará representada por catro estudantes na fase final da segunda edición do programa Líderes Digitais Universitarios. Esta iniciativa, promovida por Telefónica España a través da súa Rede de Cátedras, busca recoñecer e impulsar o talento universitario no ámbito do liderado dixital.
A fase final celebrarase os días 29 e 30 de outubro de 2026 nas dependencias de Telefónica en Madrid. Os catro seleccionados da UVigo son Pablo Alonso, estudante de Enxeñaría dos Recursos Mineiros e Enerxéticos; Alberto Nóvoa, do mestrado en Enxeñaría Informática; e Darío López e Sami Darwich Alkharat, ambos do dobre grao en Intelixencia Artificial e Enxeñaría.
A reitora, Carmen García Mateo, felicitou aos estudantes pola súa clasificación e destacou a colaboración da UVigo na Rede de Cátedras Telefónica. Na xuntanza tamén participaron o director da Cátedra Telefónica da UVigo, Jose Cidrás; o profesor coordinador do programa, Javier Rodeiro; o director Territorial de Telefónica, Manuel Ángel Alonso; a xefa de RRII e Innovación Territorial Telefónica, Ana Flores; e a responsable de RRII e Innovación T. Norte, Esther Durán.
O profesor Javier Rodeiro subliñou o potencial e a preparación do alumnado das escolas de enxeñaría da UVigo, destacando que "Tecnoloxicamente a Universidade de Vigo está moi preparada e ten unhas titulacións moi potentes que nos permiten competir con calquera de Galicia e de fóra de Galicia".
O programa Líderes Digitais selecciona estudantes de grao e mestrado das 23 institucións académicas que integran a Rede de Cátedras Telefónica. Os participantes foron avaliados en competencias dixitais avanzadas, habilidades de liderado e comunicación, e coñecemento da contorna empresarial.
Na xornada final, os participantes competirán individualmente ante un xurado cualificado, enfrontándose a retos que porán a proba o conxunto das súas capacidades. Otorgaranse sete galardóns cun total de 11.500 euros, sumando 23.000 euros en premios nesta edición.
Preto dun cento de estudantes participarán nesta edición, reflexionando sobre o impacto da intelixencia artificial na competitividade das contornas urbanas baixo a pregunta: "Unha smart city sen IA seguirá sendo competitiva nos próximos anos?".
A Rede de Cátedras Telefónica, con máis de 25 anos de traxectoria, fomenta a formación, investigación e transferencia de coñecemento tecnolóxico. A Universidade de Vigo uniuse a esta rede en 2013.
