Por cuarto ano consecutivo, o servizo municipal superou as cifras do exercicio anterior. Estes resultados consolidan Soutomaior como un dos principais puntos de información turística da provincia de Pontevedra, cunha evolución que pasou das 631 persoas atendidas no verán de 2022 ás máis de 28.800 desta última tempada.
A oficina abriu o 1 de abril e pechou o 15 de outubro, ampliando o período de atención para responder á demanda turística desde Semana Santa ata o outono. Foi o ano con maior número de visitantes e máis tempo de apertura.
“"Os datos demostran que a nosa Oficina de Turismo xa está consolidada como un dos principais puntos de información turística da provincia. Quero agradecer tamén o enorme traballo diario das técnicas da oficina, Mónica e Emma, que son fundamentais para ofrecer unha atención de calidade ás persoas que nos visitan."
O perfil das persoas usuarias está moi vinculado ao Camiño Portugués de Santiago. A maioría son peregrinos internacionais, agás en xullo e agosto, de máis de 70 nacionalidades, destacando Estados Unidos, Portugal e Alemaña. Durante o verán predominan os grupos de peregrinos doutras comunidades españolas, mentres que o visitante internacional adoita viaxar en grupos reducidos ou individualmente. Alredor do 60% das persoas atendidas son mulleres.
Setembro foi o mes de maior afluencia, seguido de xullo e xuño, confirmando o efecto desestacionalizador do Camiño de Santiago. A previsión sitúa outubro como o segundo mes con maior número de atencións.
O Concello destaca o aumento das pernoctacións en Soutomaior, unha tendencia positiva para a economía local. A concelleira Silvia Cernadas sinalou que se busca que a experiencia dos visitantes sexa tan boa que queiran volver e recomendar o destino.
A calidade do servizo está avalada pola súa integración na rede Info RíasBaixas e polo distintivo de calidade turística SICTED. O crecemento turístico repercute directamente na economía do municipio, reforzando o turismo como motor de dinamización.
