A concelleira de Cultura presentou a programación do evento, que contará coa participación de once editoriais. As actividades comezarán o 23 de abril, Día do Libro, na Biblioteca Luís Seoane de Arcade, cun espectáculo de narración oral para público adulto titulado Non sei se foi verdade ou se o lin nun libro, a cargo de Ángeles Goás.

O día 25 de abril, a xornada iniciarase ás 10.30 horas coa animación de rúa Máis Ritmo do Trío Detrés, que percorrerá as rúas desde o Cruce de Pierres ata o Multiusos. As actividades no Multiusos desenvolveranse desde as 11.30 ata as 20.15 horas.

O recinto contará con diversos espazos temáticos, como o Espazo Editorial, onde as once editoriais participantes (Antela Editorial, Edimaes Editorial, Boadicea Editora, Cuarto de Inverno, Belagua Ediciones, Galaxia, Editorial Elvira, Através Editora, Hércules Ediciones, Cooperativa Gráfica Sacauntos e Aira Editorial) presentarán as súas obras. Tamén haberá un Espazo Lector para charlas e presentacións, un Espazo Enreda con xogos, un Espazo Escenario para espectáculos, e un Espazo Artístico enfocado na creatividade e valores. Ademais, incluirase un Espazo Bebeteca para nenos de 0 a 3 anos e un Espazo Petit Furgo para gozar da lectura.

Entre as propostas destacadas figuran a presentación de libros como Netchu. O neno momia de Baltar Morgade Lores, Gorrións e Falcóns de Carmen Blanco Sanjurjo, e Bego e o mundo do revés de Iria Collazo, que incluirá un espectáculo con Vero Rilo e Luís Iglesias. Tamén haberá un contacontos infantil Lola Feroz con Juan Baquero, a presentación de Tras os pasos de Castelao na Bretaña, e o espectáculo Alicia! de Teatro Pedras de Cartón. A oferta complétase coa creación dun Pasaporte lector, a proposta Cita a cegas cun libro na Petit Furgo e un espazo artístico con ilustracións de postais lectoras.

O domingo 26 de abril, a Bodega Noelia Bebelia acollerá unha actividade especial denominada Fontes das que beber. Os asistentes terán a oportunidade de visitar a adega e participar nun obradoiro de cómic e humor gráfico con Kiko da Silva. Esta actividade, tamén gratuíta, require inscrición previa a través da páxina web do concello.