O evento, que conmemora o congreso internacional ESSE2026, reúne preto de 800 investigadoras e investigadores procedentes de máis de 33 países europeos, ademais de Xapón, Estados Unidos, Canadá ou a India. O obxectivo é debater sobre os avances no campo da lingüística inglesa e da literatura e a cultura dos países anglófonos. O acto inaugural estivo presidido pola vicerreitora de Investigación e Ciencia Aberta, Almudena Hospido, e contou coa participación do decano Elias Feijó Torres, xunto a integrantes do comité organizador.
O programa científico inclúe 15 conferencias semi-plenarias, 12 pósters, 4 mesas redondas, 69 seminarios e 3 conferencias plenarias. Entre os ponentes destacan Karen Corrigan (Universidade de Newcastle, Reino Unido), especialista en lingüística de corpus e dixitalización de ciencia aberta; Jopi Nyman (Universidade de Finlandia Oriental, Finlandia), figura clave nos estudos de fronteira na literatura actual; e a autora escocesa A. L. Kennedy, galardoada con varios premios literarios. O congreso tamén acolle unha nova edición do Doctoral Symposium da asociación.
O Comité Organizador de ESSE está integrado por 16 docentes do Departamento de Filoloxía Inglesa e Alemá da USC. O congreso conta coa colaboración da Secretaría Xeral de Turismo e a Secretaría Xeral de Política Lingüística da Xunta de Galicia, o Consello da Cultura Galega e o Concello de Santiago de Compostela. Tamén participan varios grupos de investigación da USC.
