A Biblioteca Municipal Luís Seoane de Soutomaior suma un novo recoñecemento ao ser distinguida por quinta vez nos últimos seis anos co Premio María Moliner do Ministerio de Cultura. Este galardón, que recoñece proxectos de animación á lectura en municipios de menos de 50.000 habitantes, destaca nesta ocasión o programa «Dálle a volta á biblioteca», unha iniciativa que encheu o centro de actividades para todos os públicos con motivo de diferentes efemérides.
Soutomaior atópase entre os cinco concellos da provincia de Pontevedra que obtiveron este ano o Premio María Moliner, dotado con 2.777,77 euros por galardón. A este recoñecemento súmase o premio «Bibliotecas que inspiran» da Xunta de Galicia, dotado con 3.000 euros, que a biblioteca de Soutomaior xa conseguira en dúas ocasións anteriores, sendo a única biblioteca desta categoría en logralo.
No último ano, a Biblioteca Luís Seoane recibiu máis de 9.000 euros en premios e subvencións, incluíndo fondos para a adquisición de novidades editoriais, a mellora das coleccións e o programa Ler conta moito da Consellería de Cultura. Estes recursos permítenlle renovar exemplares, incorporar novas publicacións e manter actualizados os fondos escolares.
O crecemento no uso das instalacións e servizos da biblioteca é notable, cun incremento do 30 % nos préstamos respecto de 2023. En 2025, a cifra de préstamos por cada mil habitantes ascendeu a 1.677, case un 12 % máis en dous anos. En termos absolutos, rexistráronse 12.724 préstamos en 2025, e as previsións para 2026 apuntan a un novo récord.
O número de persoas usuarias activas tamén experimentou un crecemento, con máis de 90 novas incorporadas desde 2023, pasando das 683 a 773 en 2025. O número de novos carnés expedidos tamén se incrementou, reflectindo o crecente interese da veciñanza polos servizos da biblioteca municipal.
A concelleira de Cultura, Silvia Cernadas, destacou que o novo Premio María Moliner «pon o broche a todo un ano de recoñecementos para a nosa Biblioteca Municipal», agradecendo o labor do equipo e do persoal municipal en colaboración coas persoas usuarias.
