O Instituto de Estudos e Desenvolvemento de Galicia (IDEGA) da USC puxo en marcha a Cátedra Jean Monnet ‘EU ASTER: Active Subsidiarity for Territorial Equity and Regions’. Esta iniciativa, que xa iniciou a súa actividade e terá unha duración de tres anos, busca consolidar a USC como un centro de referencia en gobernanza territorial da Unión Europea e en capacidade administrativa rexional. A Cátedra está financiada pola Unión Europea a través das Accións Jean Monnet do programa Erasmus+.
O acto institucional celebrouse no Salón de Actos do IDEGA. A directora da Cátedra, Cristina Ares Castro-Conde, profesora de Ciencias Políticas e da Administración, estivo acompañada polo vicerreitor de Innovación e Transferencia do Coñecemento, Marcelino Maneiro; o director do IDEGA, Rubén Lois; e a vicedecana de Internacionalización da Facultade de Ciencias Políticas e Sociais, Alba Alonso Vázquez. O vicerreitor destacou a importancia histórica de Galicia como rede de intercambio europeo, grazas ao Camiño de Santiago, e subliñou a necesidade de deseñar novas vías de colaboración para fortalecer a cohesión territorial e a gobernanza institucional.
Marcelino Maneiro afirmou que "Europa necesita construír pontes entre institucións e territorios, escoitar máis ás rexións e os territorios locais". Engadiu que as reflexións e propostas xurdidas desta Cátedra serán valiosas para reforzar a contribución da USC aos debates europeos sobre gobernanza multinivel e cohesión territorial.
Segundo Cristina Ares, preto de 1.100 estudantes beneficiaranse deste programa. Os obxectivos principais inclúen consolidar estudos sobre a Unión Europea na USC, reforzar a evidencia sobre a capacidade das administracións rexionais, mellorar o coñecemento sobre a aplicación territorial das políticas europeas e a xestión de fondos da UE, abrir canles de diálogo entre investigación, administracións e sociedade civil, e achegar os valores europeos á cidadanía.
EU ASTER ofrecerá unha microcredencial de 2 créditos ECTS sobre ‘Gobernanza da UE e Administración pública desde as rexións’. Ademais, porá a disposición un conxunto de datos abertos sobre capacidade administrativa rexional en España, elaborado en colaboración con responsables de fondos da UE de todas as comunidades autónomas. Este recurso será a base para análises en liña, artigos de investigación e un obradoiro internacional.
A Cátedra tamén impulsará a transferencia de coñecemento a través de eventos híbridos con expertos internacionais, pódcasts sobre a dimensión territorial das políticas da UE, obradoiros sobre equidade territorial co IDEGA e administracións, e visitas EU4Youth a centros de ensino secundario. Ao finalizar o período inicial, EU ASTER aspira a establecer na USC unha vía estable de estudos da UE e un conxunto de datos robusto, posicionando a universidade como un nodo de referencia para que a voz das rexións gañe peso nas decisións europeas.
