O pleno municipal de Mos deu luz verde por unanimidade á moción presentada polo grupo municipal do Partido Popular, que reclama estudar as alternativas propostas polo concello para o trazado da nova liña de transporte eléctrico de 220 kV e da subestación Bateas, promovidos por Rede Eléctrica.
A postura do Concello de Mos é clara: non se opón á infraestrutura nin á transición enerxética, pero considera fundamental atopar unha solución que minimice as afeccións sobre os veciños e o territorio.
Neste contexto, a alcaldesa de Mos mantivo recentemente unha reunión coas consellerías de Medio Ambiente e Industria da Xunta de Galicia. Segundo trasladou a rexedora, a Xunta mostrouse disposta a mediar para acadar unha proposta máis acorde coas necesidades territoriais.
O Concello xa presentou un informe previo de alegacións centrado en reducir o impacto do proxecto. Reclama que se estuden alternativas non contempladas, especialmente nos tramos que poderían ser soterrados, e propón aproveitar vías xa existentes para modificar o trazado.
A alcaldesa defendeu a necesidade de compatibilizar a infraestrutura coa protección dos veciños e do territorio, afirmando: “Mos non se opón á infraestrutura nin á transición enerxética. O que dicimos é que temos que avanzar e buscar unha proposta máis coherente co territorio de Mos, que reduza as afeccións aos nosos vecinos”.
Destacou a importancia da reunión coa Xunta e o traballo realizado polo concello: “Estamos facendo todo o que nos corresponde: reunímonos coas administracións, falamos con Rede Eléctrica, seguimos escoitando aos colectivos afectados e traballamos nas nosas alegacións e alternativas”.
A rexedora insistiu na vontade de alcanzar un acordo: “Queremos avanzar. A infraestrutura é necesaria, pero tamén é necesario que se estude como facela compatible co territorio. Se todos temos vontade de buscar unha solución, hai marxe para mellorar a proposta actual”.
Finalmente, reclamou que Mos teña o mesmo nivel de interlocución que outros territorios afectados: “Pedimos que se escoite a Mos, que se estuden as alternativas que propuxemos e que se busque entre todos unha solución máis equilibrada”.
Ademais, o 1 de outubro celebrarase no Centro Cultural Os Castros de Pereiras unha asemblea aberta á veciñanza, convocada pola Comunidade de Montes de Pereiras, para explicar o proxecto da liña de alta tensión e recoller valoracións de técnicos e especialistas. Próximamente tamén haberá unha reunión veciñal en Sanguiñeda.
