O obxectivo da xuntanza é detallar as afeccións previstas no municipio e resolver dúbidas sobre o procedemento de información pública deste proxecto enerxético.
Para facilitar a comprensión e a participación cidadá, o Concello contratou unha empresa especializada en asesoramento técnico ambiental. Esta entidade informará sobre os proxectos da liña e da subestación Bateas, e guiará aos afectados sobre como presentar alegacións e defender os seus intereses.
O Concello de Mos subliña que non se opón á infraestrutura eléctrica nin ás necesidades enerxéticas para o desenvolvemento industrial. Non obstante, reclama que se escoiten as preocupacións do municipio e dos veciños, e que se consideren alternativas ao trazado actual.
Busca atopar unha solución que satisfaga as demandas enerxéticas minimizando o impacto sobre o territorio, as vivendas, os equipamentos e as parroquias afectadas: Tameiga, Petelos, Sanguiñeda e Pereiras. Entre as propostas municipais figura o aproveitamento de corredores e infraestruturas xa existentes.
A corporación municipal anima especialmente aos propietarios e residentes das zonas potencialmente afectadas a asistir á reunión para coñecer de primeira man os detalles do proxecto e as vías para presentar as súas alegacións dentro do prazo establecido.
