Esta iniciativa permitirá que empresas xestoras de todo o Estado poidan participar nun concurso aberto para o desenvolvemento de vivenda residencial. O organismo cualifica este modelo como unha fórmula "pioneira" dentro da administración pública, buscando ampliar a oferta de vivenda asequible na cidade.
“"Se queremos ter os nosos parques empresariais cheos de empresas, con proxectos importantes, os traballadores deben ter un espazo no que poder vivir e desenvolverse."
O proxecto enmárcase na estratexia da Zona Franca para incrementar a oferta de vivenda asequible en Vigo e facilitar o acceso a alugueres a prezo moderado, especialmente para persoas traballadoras. Esta actuación busca dar resposta á demanda existente e contribuír á atracción e retención de talento nos parques empresariais da cidade.
Tras a súa aprobación no Comité Executivo e no Pleno do Consorcio, a Zona Franca sacará a concurso a adxudicación do dereito de superficie das parcelas situadas nos números 34, 38-40 e 42 de Alcalde Portanet. O procedemento valorará aspectos como a calidade arquitectónica, a eficiencia enerxética, a sustentabilidade, o plan de mantemento e a viabilidade económica e financeira, ademais da oferta económica. As vivendas deberán destinarse obrigatoriamente a aluguer como residencia habitual e permanente.
A Zona Franca defende este modelo como unha fórmula innovadora de colaboración público-privada que permite mobilizar solo público para xerar vivenda asequible sen perder a titularidade dos terreos. O obxectivo é aumentar a oferta residencial en Vigo nun contexto de alta demanda e prezos tensionados no mercado do aluguer.
