A reitora da Universidade de Vigo, Carmen García Mateo, e o presidente da Deputación de Pontevedra, Luis López, mantiveron este mércores unha reunión de traballo. Na xuntanza tamén participaron a vicerreitora do campus de Pontevedra, Marián Fernández, e a xerenta da UVigo, Ana Comesaña. O obxectivo principal foi analizar novas vías de cooperación entre as dúas institucións, avaliar programas en marcha e estudar plans de futuro de interese mutuo.
Este primeiro encontro institucional entre responsables das dúas institucións, despois do nomeamento de García Mateo como reitora o pasado mes de xuño, celebrouse no marco do inicio do curso universitario. A reunión estivo marcada polo ton cordial e construtivo, e ambos os dirixentes fixeron balance do amplo historial de colaboración entre a Deputación e a Universidade, que conta con distintos plans de colaboración abertos en diversas áreas, cun valor aproximado de 400.000 euros.
Entre os proxectos máis destacados atópanse o programa Erasmus+ para financiar bolsas do alumnado que participa en programas de mobilidade internacional, a Cátedra do Deporte e a Saúde, a Cátedra de Feminismos 4.0 e a cooperación para impulsar o Campus Crea.
Ambos os responsables coincidiron na importancia de desenvolver ferramentas estratéxicas e microcredenciais para formar perfís específicos, como os traballadores dos concellos, no eido da formación. A cooperación leal e fluída continuará a rexer a relación entre ambas as institucións, co compromiso de manter un contacto constante para ofertar formación e actividades de interese e alto valor.
