O operativo prestarase nas praias de Rodas, Fortiñón, Canido, O Vao, Fontaíña, Samil, Samil Dereita, A Fonte, Santa Baia, Carril, Bouzas, A Punta e O Mende.
O servizo estará integrado por máis de 130 profesionais, entre os que se inclúen 70 socorristas, 25 axentes da Policía Local, 12 socorristas destinados ás piscinas municipais e 20 traballadores do servizo de limpeza, conformando un amplo dispositivo orientado a garantir a seguridade de veciños e visitantes durante toda a tempada estival.
Entre as funcións do operativo figuran a prevención de accidentes, a vixilancia das zonas de baño e dos areais, os labores de salvamento e socorrismo, os rescates acuáticos, o control do público durante as intervencións e a atención de emerxencias mediante primeiros auxilios.
Ademais, o servizo contará cunha ambulancia para o traslado de persoas accidentadas e un vehículo de intervención rápida que permitirá reducir os tempos de resposta ante calquera incidencia.
Por segundo ano consecutivo, o Concello manterá tamén un servizo de vixilancia mediante moto acuática con base na praia de Samil, dende onde poderá desprazarse ao resto de praias do municipio, coa excepción de Rodas. A iso súmase a instalación de 15 desfibriladores distribuídos polas distintas areais para reforzar a capacidade de resposta ante emerxencias sanitarias.
O dispositivo incorpora así mesmo un servizo específico de apoio ao baño para persoas con mobilidade reducida, co obxectivo de seguir avanzando na accesibilidade universal das praias viguesas.
Durante a segunda quincena de xuño e a primeira de setembro, as praias de Samil, Samil Dereita, O Vao e Fortiñón disporán de socorristas de luns a venres entre as 16:00 e as 20:00 horas, mentres que as fins de semana o horario ampliarase de 12:00 a 20:00 horas.
Na Praia de Rodas, o servizo funcionará todos os días entre as 13:15 e as 19:00 horas, adaptándose aos horarios das embarcacións que conectan coas Illas Cíes.
Pola súa banda, o resto de praias contarán con cobertura de socorrismo durante as fins de semana entre as 12:00 e as 20:00 horas.
Durante os meses de xullo e agosto, as trece praias disporán de servizo de salvamento e socorrismo todos os días entre as 12:00 e as 20:00 horas. Ademais, o dispositivo sanitario de Samil abrirá unha hora antes, ás 11:00 horas.
