A Avenida de Samil será o escenario principal deste gran evento, que mobilizará a máis de 3.200 efectivos. A medida que se achega a data, vanse desvelando os detalles dunha das conmemoracións máis significativas a nivel estatal, que por primeira vez se celebra na cidade olívica.

O desfile aéreo será o primeiro en desenvolverse, con 17 formacións que sobrevoarán os ceos de Vigo. Entre elas, destacarán tres de caza e ataque con avións C/CE-15 e C/CE-16, procedentes da base de Zaragoza. Tamén participarán aeronaves de loita contra incendios, avións de gran capacidade para evacuación e un cargueiro bimotor CN-235 do Servizo Aéreo da Garda Civil para rescates marítimos. O espectáculo aéreo completarase con 25 helicópteros do Exército de Terra e da Armada, pechando coa tradicional formación Mirlo da Academia Xeral do Aire.

Por terra, seis agrupacións diferentes marcharán pola Avenida de Samil. A primeira será a Agrupación de Honores da Garda Real, seguida por unha agrupación da Armada, que inclúe a Infantería de Mariña. Tamén desfilarán tres escuadrillas do Exército do Aire, un grupo mixto da Garda Civil e a Unidade Militar de Emerxencias (UME) con guías caninos de rescate. Catro compañías do Exército de Terra, entre elas a Brilat VII de Pontevedra, tamén estarán presentes. Finalmente, unidades con paso específico como o Grupo de Regulares de Ceuta e o Tercio "Gran Capitán" nº 1 da Lexión de Melilla pecharán o desfile terrestre.

Ademais do desfile, as pistas de atletismo de Balaídos permanecerán pechadas desde o vindeiro luns ata o 5 de xuño debido a obras de reparación e á presenza militar. Este peche, que inclúe unha exhibición de persoal e material o 27 de maio, xerou malestar entre algúns deportistas que ven afectadas as súas preparacións para a tempada.